Sleppur ikki at hava hundin til Føroya

Allir hundar eru ikki vælkomnir í Føroyum.

Hundar, sum verða mettir at vera vandamiklir, sleppa ikki inn í landið, heldur ikki við undantaksloyvi.

Heilsufrøðiliga starvsstovan noktaði at geva innflutningsloyvi til ein hund av slagnum Staffordshire Bull Terrier.

Avgerðin varð kærd til Vinnukærunevndina, sum staðfesti avgerðina hjá Heilsufrøðilgu starvsstovuni.

Fekk starv í Føroyum

Kærarin vildi innflyta hundin, tí hann fekk boðið starv í Føroyum, og ætlaði at flyta til Føroya. 

Staffordshire Bull Terrier er á listanum frá 2004 við hundasløgum, sum ikki eru loyvd at innflyta til Føroya.

23 hundasløg eru í tí listanum.

Vinnukærunevndin er samd við Heilsufrøðiligu starvsstovu um, at Staffordshire Bull Terrier kann vera vandamikil fyri djór og menniskju. 

Tí verður undantaksloyvi ikki latið.