Suðuroyartunnil vorðin ein ætlan hjá landinum

Nú er Suðuroyartunnilin vorðin ein ætlan hjá landsstýrinum.

Eftir ætlan verður farið undir Suðuroyartunnilin, tá Sandoyartunnilin er liðugur, stendur í uppskotinum hjá landsstýrinum um eykajáttanarlóg, sum nú er í tinginum.

Sandoyartunnilin verður væntandi liðugur í 2023. 

Upp í Skúgvoynni

Landsverk hevur víst á eina loysn, har Suðuroyartunnilin fer av Sandi yvir Skúgvoynna til Sandvíkar. 

Jarðfeingi hevur gjørt tilmæli til Landsverk um, hvørjar jarðfrøðiligar kanningar eiga at verða gjørdar fyri at hava haldgott grundarlag at fara undir verkætlanina. 

Í uppskotinum um eykajáttan mælir Henrik Old, landsstýrismaður, til at brúka hálva millión í ár til forkanningar um Suðuroyartunnilin.

Ein tunnil millum Sandoynna og Suðuroynna verður góðar 26 kilometrar.