Endurskoðað aðalráð komið á politiskt borð

Frágreiðingin hjá aðalstjóranum í Uttanríkis- og vinnumálaráðnum, Herálvi Joensen, um aðalráðið er nú liðug og latin landsstýrismanninum.

Poul Michelsen, landsstýrismaður, sigur, at hann fer nú at kanna, um okkurt í ráðnum skal broytast.

Tað verður gjørt í sambandi við uppskotið um fíggjarlóg fyri 2018.

Tað uppskotið skal vera liðugt um ein mánað. 

Keypmannahavn

Millum annað skal støða takast til sendistovuna ella umboðsstovuna í Danmark.

Einki sendifólk er sett í starvið í Keypmannahavn, síðani Sigmundur Ísfeld gavst har í fjør. 

Hann er tó framvegis virkandi sendimaður í Keypmannahavn, hóast hann er fluttur aftur til Føroya at búgva og arbeiða í Uttanríksráðnum. 

Sigmundur Ísfeld er á sendistovuni í Keypmannahavn eina ferð um mánaðin, sigur Poul Mchelsen.

At vera sendimaður í Keypmannahavn er partur av starvinum hjá Sigmundi Ísfeld í Uttanríkisráðnum.

Føroyska sendistovan í Keypmannahavn er umboðsstova meira enn sendistova, tí hon hevur ikki diplomatiska viðurkenning, sigur Poul Michelsen.