Stórur meiriluti vil loyva høgu høllini á Skála

Átta býráðslimir í Runavík vilja broyta byggisamtyktina á Skála, so skipasmiðjan Mest kann byggja eina 40 metra høga høll.

Býráðið samtykti hósdagin við átta atkvøðum fyri, einari ímóti og einari blankari at taka undir við tilmælinum frá meirilutanum í Byggi- og býarskipanarnevndini um at broyta byggisamtyktina.

Kommunan fekk tvey mótmæli um ætlanina at broyta byggisamtyktina, eitt við 129 undirskriftum og eitt við tveimum undirskiftum. 

Uppskotið um at broyta byggisamtyktina verður nú saman við mótmælunum sent Býarskipanarnevnd landsins, sum ger tilmæli til landsstýriskvinnuni í kommunumálum, Sirið Stenberg. Hon tekur síðani avgerðina um byggisamtyktina á Skála. 

Høllin, sum Mest ætlar at byggja oman á turrdokkina á Skála, verður stívar 40 metrar høg, 129 metrar long og 34 metrar breið.