Høgni er gerandishetja

Undir heitinum hetjur í gerandisdegnum hevur Fólkaheilsuráðstevna verið.

Gerandis hetjur eru vanlig fólk, sum gera mun á ymsan hátt í gerandisdegnum.

Og ráðstevnan endaði við, at ársins fólkaheilsuvirðisløn var latin gerandishetjuni, Høgna Kunoy Dávason. 

Dómsnevndin fekk 23 uppskot inn. Pápi Høgna tók ímóti heiðrinum, tí Høgni Kunoy Dávason er til kapping í Danmark. 

Drongurin við svarta beltinum

Vit komu at kenna Høgna Kunoy Dávason í sendingini, Drongurin við svarta beltinum.

Høgni hevur lívshættisligu sjúkuna cystiska fibrose, og tí tekur 11 ára gamli drongurin fleiri enn 160 tablettir um dagin.

Men tað er eitt heilt serligt seiggj í Høgna.

Venur fleiri enn 100

Hóast sín unga aldur stovnaði Høgni sítt egna taekwondofelag.

Nú venur hann yvir 100 børn, ung og vaksin.

Høgni hevur verið ofta undir skurði, men hann venur dagliga hart fyri at halda lungakapasitetin uppi.