Markið fyri familjuískoyti hækkar

Trivnaðarnevndin hevur lagt álit fyri løgtingið.

Meirilutin í Trivnaðarnevndini, sum eru umboðini hjá samgonguni, saman við Jenisi av Rana, vísa á, at tá familjuískoytið varð samtykt, varð ásannað, at høvuðsamboðið í stríðnum móti fátækradømi er útbúgvingar- og arbeiðsmarknaðarpolitikkir, og at mest týðandi er, at borgarar í Føroyum fóta sær á arbeiðsmarknaðinum. 

Nevndin ynskir, at børn hjá pørum í trongum fíggjarligum korum skulu verða lyft. Pør við børnum hava ikki somu stuðulsmøguleikar, sum stakir uppihaldarar hava, og tí metir nevndin tað vera rætt at hækka inntøkumarkið hjá pørum við nakað meir enn ætlað. Tí verður skotið upp at hækka inntøkumarkið úr 230.000 kr. upp í 280.000 kr, tí tað fer at bøta um korini hjá lágløntum pørum og børnum teirra. 

Nevndin vísir á, at nú familjuískoytið hevur verið í gildi í 2 ár vísa royndirnar, at einans 34 av teimum 267 familjunum, sum í 2017 hava móttikið familjuískoyti, eru pør. 

Lógin um familuískoyti verður eftirmett komandi ár, sum upprunaliga ætlað, og Trivnaðarnevndin ætlar at fylgja gongdini. 

Kaj Leo Holm Johannesen sigur í sinum minnilutaáliti, at hann tekur undir við álitinum og mælir løgtinginum til at samtykkja uppskotið.

Elsebeth Mercedis Gunnleygsdóttir tekur støðu til uppskotið í tingsalinum.