Søkja eftir nýggjum stjóra til Vága floghavn

Vága floghavn fer nú at søkja eftir nýggjum stjóra.

Kitty May Ellefsen, forkvinna í nevndini fyri Vága floghavn, sigur, at søkt verður eftir nýggjum stjóra í vikuni, og umsóknarfreistin verður 1. februar.

Starvið verður ikki áramálssett.

Síðani Jákup Sverri Kass fór úr starvinum sum stjóri á flogvøllinum í november, hevur Evy Jacobsen verið virkandi stjóri. Evy Jacobsen situr eisini í nevndini fyri Vága floghavn.

Aftur met

Ferðafólkatalið í Vágum setti aftur met í fjør.

Tilsamans komu og fóru 341.400 fólk um flogvøllin. Longu í oktober fór ferðafólkatalið upp um 300.000.

Í fyrraárið komu og fóru 292.400 fólk um flogvøllin.