Nýbrot innan krabbameinsgransking

Vísindafólk hava tikið eitt stórt fet innan krabbameinsgransking, skrivar BBC.

Eitt granskingarlið í Johns Hopkins University í USA hevur royndarkoyrt eina mannagongd, sum kann fáa eyga á átta vanlig sløg av krabba nógv fyrr enn higartil hevur verið vanligt.

"At finna krabbamein tíðliga er altavgerandi, og tí kann hetta fara at minnka um deyðatíttleikan millum krabbameinssjúklingar" sigur Cristian Tomasetti á Johns Hopkins University við BBC.

Mannagongdin var royndarkoyrd við 1,005 sjúklingum, sum høvdu krabbamein í eggrót, livur, maga, briskertli, vælindi, kolon, lunga og brósti, sum ikki enn hevði spjatt seg til aðrar partar av kroppinum.

Tilsamans fann nýggja mannagongdin 70 prosent av krabbameinssjúkunum bara við at hyggja at DNA í blóðinum.

Krabbameinssvullur letur smá spor av muteraðum DNA út í blóði, og nýggja krabbameinsroyndin kann fáa eyga á hesi spor.

DNA frá krabbameinskyknum er øðrvísi enn vanligt DNA, og við hesum ber til at finna krabbasjúkuna fyrr, sigur bretski krabbameinsgranskarin Richard Marais við BBC.