Ærumeiðing: Rithøvundurin hevur fríar teymar

Um jólini las Kringvarpið stuttsøguna Niður við nakkanum, sum Oddvør Johansen hevur skrivað.

Stuttsøgan, ið snýr seg um ein mann, sum fer frá konuni, ið hevur torført við at góðtaka nýggju støðuna, skapti ávísa øsing á sosialu miðlunum; onkur segði seg kenna seg aftur í ekskonuni.

Sjálv vísir rithøvundurin hesum aftur; søgan er um seg sjálva og mannin fyri nógvum árum síðani, sigur Oddvør Johansen.

Føroyingar hava altíð gitt

Hvussu er og ikki; so er tað ikki fyrstu ferð, at fólk kenna seg aftur í - og kenna seg stoytt av - skaldskapi.

 - Føroyingar hava altíð lisið skaldskap við eitt sindur av veruleika uppií. Hóast tað hevur staðið skaldsøga til dømis í eini bók, sum er komin út, so hava fólk sitið og gitt, hvør er hvør í heis skaldsøguni, sigur Bergur Djurhuus Hansen, lektari í bókmentum, sum kann vísa á fleiri dømi um skaldskap, har veruleiki og fiktión eru samanblandað.

Listarligt frælsi

Men tað er ikki at gera við tað. Listarliga frælsi er sera vítt, sigur Jógvan Páll Lassen, advokatur, sum ikki kennir til nøkur dømi, har fólk hava stevnt listarfólki fyri ærumeiðing.

 - Tað skal vera ein álvarsom skuldseting, sigur Jógvan Páll Lassen.