Vilja banna ballónir við helium á tjóðardegnum

Vit kenna tær á ólavsøku, litføgru heliumsballónirnar, og tað gera norðmenn eisini á teirra tjóðardegi.

Men tá norðmenn um ein mánað fara at hátíðarhalda tjóðardagin, verða tær veælkendu ballónirnar við heliummi ikki at síggja í mongum kommunum.

NRK skrivar, at eitt vaksandi tal av býum halda, at ballónirnar eru ringar fyri umhvørvið, og at tað tí ikki verður loyvt at selja tær.

- Vit vilja ikki hava sølu av heliumsballónum. Ov nógv dálking er av teimum, sigur Egil Olsen, formaður í 17. mai-nevndini í Stavanger við NRK.

- Missur tú eina ballón, ja, so endar hon vanliga á sjónum, sigur hann.

Tað sama siga Bergen, Haugesund og Tromsø: ongar heliumsballónir skulu seljast á kommunalari grund á tjóðardegnum.

Í Tróndheimi hevur býráðið tó avgjørt, at loyvt er at selja tær, men so skulu ballónirnar hava eitt lodd í endanum, so tær ikki fara á flog og elva til dálking. Í Oslo fara tey at viðgera ballónmálið 25. apríl, skrivar NRK.

Ballónir verða tó til keyps, men við luft í.

Umhvørvisflokkurin, Tey Grønu, hevur skotið upp at seta bann fyri sølu av ballónum við' heliummi.

- Fólk flest eru troytt av flúgvandi plastdálking, sigur Rasmus Hansson úr grøna flokkinum við NRK.