Meirilutin í Havn vil hava lógarheimildina

Býráðið í Havn samtykti í gjárkvøldið at biðja landsstýrið um at síggja til, at kommunan kann krevja bústaðarskyldu.

Lógarheimild krevst fyri at at krevja bústaðarskyldu.

Meirilutin í býráðnum, Fólkaflokkurin, Tjóðveldi og Framsókn, atkvøddi fyri.

Annfinn Brekkstein í Sambandsflokkinum og Halla Samuelsen í Javnaðarflokkinum atkvøddu ímóti.

Hini javnaðarfólkini atkvøddu blankt.

Í fyrsta umfari verður hugsað um at krevja bústaðarskyldu á Reyni og í Nólsoy.

Felt fyrr

Tórshavnar býráð hevði eisini spurningin um bústaðarskyldu í Havn frammi í 2014.

Tá feldi býráðið eitt uppskot um at heita á landsstýrið um at útvega kommununum lógarheimild at seta krav um bústaðarskyldu.

Meirilutin vísti á eitt løgfrøðiligt upprit hjá Løgdeildini hjá býráðnum, sum staðfesti, at kommunur hava onga heimild til at krevja bústaðarskyldu.

Býráðið samtykti eisini tá í 2014 at mæla frá at seta bústaðarskyldu á hús, sum kommunan sjálv selur í miðbýnum í Havn.