TK: Ein milliard í inntøku

Tórshavnar kommuna væntar at fáa 999 milliónir krónur í inntøkum næsta ár.

Fíggjarætlanin verður løgd fram í ovurmorgin, og har væntar kommunan, at inntøkuvøksturin verður 5,1 prosent. Men útreiðsluvøksturin er næstan eins stórur, 4,9 prosent.

Kommunan sigur, at vaksandi talið av skattgjaldarunum, kosta eisini í vaksandi tørvi á tænastum og útbyggingum. 

Serliga er stórur vøkstur í talinum á dagstovnaplássum, sigur kommunan, sum roknar við 149 nýggjum dagstovnaplássum næsta ár. Ávísar raðfestingar verða eisini gjørdar, so sum at veita skúlunum í kommununi betri internet, og at talgilda fyrisiting og tænastur til borgaran.

Tórshavnar kommuna brúkar eisini pengar til at gjalda skuld aftur og sigur, at nú verður kommunan skjótt skuldarfrí.

Íløgur skulu gerast fyri 160 milliónir næsta ár. Nógv tann størsti parturin fer til skúlan á Fløtum, sum skal verða liðugur í 2020 og til Musikkskúlan, sum skal takast í nýtslu næsta summar.

Afturat kommunalu íløgunum ger Tórshavnar havn íløgur fyri 100 mió. kr. í havnaútbyggingina næsta ár. 

Fíggjarætlanaruppskotið verður lagt fram í Tórshavnar býráði hósdagin í hesu vikuni, tá tað fer til politiska viðgerð í føstu nevndunum. 

Fíggjarætlanirnar hjá kommununum skulu vera endaliga samtyktar í seinasta lagi 1. desember.