Svartkjaftur lutaður út til vinnuligar royndir

Svartkjaftur verður nú eisini lutaður út til vinnuligar royndir í ár.

Kunngerðin um svartkjaftaveiðu verður broytt fyrsta dagin, so 8.382 tons verða at býta til royndir og verkætlanir.

Umsóknarfreistin er á middegi 22. oktober.

Serstakur dentur verður lagdur á menningar- og nýskapanarvirði og virðisøking, sigur Fiskimálaráðið.

Í summar býtti Fiskimálaráðið 1.925 tons av makreli og 3.700 tons av sild til vinnuligar fiskiveiðiroyndir.

Fiskimálaráðið fekk tíggju umsóknir um makrelkvotuna, tær vóru 9.900 tons. Fiskimálaráðið játtaði fimm umsóknum.

14 umsóknir vóru um sildina, 19.850 tons, men seks fingu sild.

Avgerðirnar vórðu tiknar eftir innanhýsis viðgerð í Fiskimálaráðnum og í samráð við Havstovuna.