Vindmyllulund í Porkeri útsett

Evsta mark var í dag, men tað er nú longt til 1. mars næsta ár. 

Ari Johanneson, ráðgevi á Umhvørvisstovuni, sigur, at tað er eftir ynski frá norska felagnum, Kjeller Vindteknik, saman við týska vindmylluveitaranum, Enercon, tí tey vilja hava fleiri mátingar í Porkeri.

Fyri góðum hálvum-øðrum ári síðani varð ein 80 metrar høg mastur sett upp í Porkeri at máta vind. Men nógvur turbulensur er í økinum, og tí varð neyðugt við einari mátingarmastur nakað niðanfyri hina fyri at dekka størri øki. 

Henda masturin hevur mátað síðani í summar, og neyðugt er við fleiri mátingum frá henni, áðrenn avgjørt verður, hvar vindmyllurnar skulu standa.

Eftir ætlan skulu upp í 12 vindmyllur setast upp, og tá tær standa uppi, kostar verkætlanin um 100 milliónir krónir.