Skal svara spurningi um sendimannin í Keymannahavn

Løgmaður skal nú greiða frá støðuni við føroyska sendimanninum í Keypmannahavn.

Edmund Joensen úr Sambandsflokkinum hevur fleiri ferðir spurt landsstýrismannin í uttanríkismálum, hvørjar ætlanir hann hevur við sendistovuni í danska høvuðsstaðnum, nú føroyski sendimaðurin ikki hevur verið til arbeiðis har í áravís.

Nú spyr løgtingsmaðurin so løgmann, um hann heldur tað vera í lagi at játta pengar á fíggjarlógini til sendistovuvirksemi í Danmark, tá pengarnir verða brúktir til okkurt annað.

Sambært Edmundi Joensen hevur eingin fastur sendimaður verið í Keypmannahavn í tvey til trý ár. 

Edmund Joensen vísir á, at Poul Michelsen sjálvur hevur upplýst fyri løgtinginum, at sendimaðurin í staðin hevur arbeitt við Fjareystri. 

- Ætlar løgmaður at rætta avgerðina hjá landsstýrismanninum, so at sendimaðurin aftur kann virka á Sendistovu Føroya í Keypmannahavn, spyr Edmund Joensen.

Samlaðu útreiðslurnar til sendistovuna í Keypmannahavn eru góðar fimm milliónir krónur í ár.

Talan er um ein grein-52 fyrispurning, sum løgmaður skal svara innan 10 yrkadagar.