Eiðis kommuna lækkar barnaansingargjaldið

- Vit hava sammett okkum við nærmastu grannakommunurnar í Eysturoynni, og gjaldið hjá okkum verður lægri enn hjá teimum.

- Vit vilja gera tað meira liviligt hjá fólki, sigur Jógvan í Skorini, borgarstjóri.

Gjaldið fyri børn undir trý ár lækkar 355 krónur um mánaðin.

Gjaldið fyri børn eldri enn trý ár lækkar 300 krónur.

Avsláttur verður somuleiðis latin foreldrum, sum hava tvey ella fleiri børn í dagstovni.

Borgarstjórin roknar við, at tað fer at kosta kommununi slakar 200 túsund krónur um árið.

- Hetta kostar lítið í mun til tað, vit fáa burturúr, sigur hann.

- Men hví lækka tit ikki skattaprosentið ístaðin, so øll í kommununi fáa ein lætta?

- Vit halda, at skattaprosentið hjá okkum er lágt. Tað er eingin loyna, at barnafamiljur, sum skulu seta búgv, hava tað vanliga tungt fíggjarliga. Og tað er teimum, vit vilja hjálpa, sigur Jógvan í Skorini, borgarstjóri á Eiði.

Skattaprosentið á Eiði er 18,75 prosent.

Fíggjarætlanin hjá Eiðis kommunu varð einmælt samtykt í gjárkvøldið. Skuldin hjá kommununi verður við ársenda 2019 slakar átta milliónir krónur.

1,5 millión krónur eru settar av næsta ár at rinda niður skuld.