Danska reglur um koyring og hvíld í Føroyum

Danskar reglur um koyri- og hvílitíðir hjá teimum, sum koyra stórar lastbilar, skulu eisini galda í Føroyum.

Men neyðugt er at broyta ferðslulógina fyrst. 

Samferðslumálaráðið hevur sent lógarbroytingina til hoyringar.

Sambært lógarbroytingini kann landsstýrisfólkið áseta reglur um koyri- og hvílutíðir og kann gera av, at reglur um koyri- og hvílutíðir, sum danski ferðslumálaráðharrin ásetur, heilt ella partvíst skulu galda í Føroyum.

Samferðslumálaráðið sigur, at Føroyar eru farnar frá at vera eitt samfelag, har neyðugt var at sigla millum flestu oyggjar, til at verða eitt samfelag, sum er knýtt saman í einum vegakervi við undirsjóvartunlum.

Tí er mesti farmaflutningurin nú við lastbilum op treylarum og ikki við skipum.

Og tey, sum koyra hesar lastbilar, skulu nú hava lógarásettar reglur um, hvussu leingi, tey kunnu koyra í senn, og hvussu leingi, tey skulu hvíla seg millum ferðirnar.