Gýtingarstovnurin næstan 80 prosent størri

Nógv meiri makrelur er til enn kanningar vístu í fjør heyst.

Gýtingarstovnurin er 77 prosent størri enn mett varð í heyst, vísir ein nýggj kanning hjá ICES.

Makrelstovnurin er sambært nýggju kanningini ikki longur í vanda.

Sannlíkt er, at ICES endurskoðar tilmæli sítt um heildarveiðuna í ár.

Men tað hendir ikki av sær sjálvum. Strandalondini noyðast at biðja um tað. Tey hava longu tosað við ICES um støðuna.

Størri stovnur

Gýtingartovnurin er nú mettur at vera 4,16 mió. tons.

Í fjør heyst varð hann mettur til 2,35 mió. tons.

ICES hevur mælt til, at heildarkvotan í ár verður 318.000 tons. Tilmælið fyri 2018 var 550.000 tons.

Strandalondini geva sær sjálvum kortini so stórar kvotur, at tær samanlagdar eru nógv størri enn tilmælið hjá ICES.

Føroyska makrelkvotan er 20 prosent minni enn í fjør. Hon er 82.339 tons í ár.