Skulu steðga hummarafiskiskapi áðrenn mánadagin

Brøðurnir Sólarn og Marne Isaksen hava fingið boð um, at teir skulu steðga við hummarafiskiskapi í økinum uttanfyri Skálatoftir í Haraldssundi.

Bakkafrost hevur havt aliloyvi í økinum síðani 2015, men vilja nú seta nýggjar ringar út í økinum, soleiðis at ringarnir nú liggja har, sum hummararúsurnar hava ligið. 

Isaksen brøðurnir føla seg trýstir alsamt longur út av fjørðinum, til tað nú ikki er nakað øki egna til hummarafiskiskap eftir. 

Sólarn Isaksen sigur, at teir ikki vórðu hoyrdir, tá aliloyvið upprunaliga varð givið alirisanum í 2015. Sambært honum gloymdi Heilsufrøðiliga starvsstovan at hoyra brøðurnir, hóast teir hava fiska hummara í Haraldssundi síðani 1986.