Kitty May Ellefsen hevur fingist við alt tað, sum ikki er bleytt. Staðið á odda fyri Vága Floghavn, arbeitt í Vinnumálaráðnum, verið býlingastjóri í SMS v.m. Nú hevur hon sum 53 ára gomul skift lívsleið. Hon ynskir at gerast sjúkrarøktarfrøðingur. 

- Tá eg fór at lesa sum ung, vóru tað  onnur ting, ið eg legði dent á. Pengar og karrieru. Men tað er tað ikki longur. Eg havi funnið útav, hvussu fantastiskt arbeiðið sum sjúkrarøktarfrøðingur er, sigur 53 ára gamla Kitty May Ellefsen. 

Kitty May Ellefsen er útbúgving cand.merc.jur. og hevur nógvar arbeiðsroyndir innan politikk og vinnulívið. 

- Lívið broytir teg, og tað kenni eg eisini á mær, at tað hevur gjørt. Fyrr hevði tað týdning at hava arbeiði, har eg tjenti nógv, soleiðis at eg kundi fáa ráð til ymiskt materielt. Men tað hevur ongan týdning nú. Eg varnaðist, at tá eg hevði fingið tað, eg ynskti mær, so byrjaði eg at hugsa um meining. Gevur hetta meining? Tað haldi eg, at sjúkrarøktarfrøði-útbúgvingin ger.