Skrá Sjón

Nýggjárssending, har vit við samrøðum, tónleiki og beinleiðis innsløgum kring landið, líta aftur á árið, ið fer

Havstein Klein, prestur, prædikar.

Heimildardokumentarur um tá ið torvið fór í søguna fyri útvið 60 árum síðani.

Eitt summarið fyri góðari hálvari øld síðani var 72-ára gamli Símun Højgaard á heiðuni í Rituvík og skar torv. Árið varð helst 1966. Hetta var eitt av teimum seinastu árunum, at føroyingar skóru torv av týdningi, eftir at torvið hevði verið høvuðsorkukeldan í Føroyum heilt frá landnámstíð. Eitt tíðarskeið í Føroya søgu var av.

Hepnið vildi, at ein ungur amatørfotografur úr Sandvík var á staðnum og fangaði løtuna við sínum 8 mm Canon filmsupptakara. Saman við vinmanninum, Jóhan Højgaard úr Havn, hevði Sune Joensen sett sær fyri at skjalfesta ein part av føroyskari arbeiðsmentan og siðsøgu, sum um hetta mundið var komin fram at gravarbakkanum.

Í meira enn eina hálva øld lógu tær gomlu filmsupptøkurnar goymdar í eini skuffu, uttan at nakar gav teimum stórvegis ans. Nú hevur Dánjal Højgaard, sonur Jóhan Højgaard, sum varð smádrongur tá og sjálvur var við á upptøkunum, leitað gamla vinmannin hjá pápa sínum upp. Suni, sum er vorðin 91 ára gamal hevur riggað tann gamla filmsframvísaran til, og sjónvarpsliðið sleppur at vísa føroyingum, hvat tað var, hann sá og festi á film hetta summarið.

Gjøgnum filmslinsuna hjá Suna Joensen verður áskoðarin førdur aftur í eina tíð, sum er burtur. Til heimin í gjár. Vit fara afturum ein av seinastu torvskurðarmonnunum í Føroyum, og saman við søguni um torvið og torvarbeiði sigur heimildarsendingin frá lívskorum í niðursetubygdini Rituvík, sum fyllir 150 ár í hesum døgum, og har torvið var ein avgerandi fortreyt fyri búsetingini.

Vit fara aftur á slóðina: til farvegin av teimum gomlu torvheiðunum. Og vit møta nøkrum av teimum gomlu fólkunum, sum upplivdu ta gomlu tíðina og fingu um endan á seinasta orkuskiftinum, sum fór fram miðskeiðis í 20. øld, tá tann nýggja tíðin, við elektriskum streymi og olju, troðkaði torvið av.

Lagt til rættis: Dánjal Højgaard og Hans Petur Hansen.

Í 1977 ferðaðist Egil Bakka í Føroyum og gjørdi filmsupptøkur av føroyskum dansi og dansispølum. Vit síggja hansara upptøkur av Velbastað og vit hoyra Jóannes Dalsgarð og Trónd og Fridu við Á siga frá um upptøkurnar og um føroyskan dans og føroysk dansispøl í bygdunum heimanfyri. Eisini verða forkunnugar upptøkur frá dansiferð í Oslo í 1932 at síggja.

Ringur sjóverkur og viðkvæma sinnalagið gjørdu, at 86 ára gamli Arnhold Vegghamar ikki bleiv sjómaður, sum flestu javnaldrarnir á Viðareiði.

Og tað munnu mong vera glað fyri í dag, tí sermerktu og litríku málningarnir hjá Vegghamar eru ógviliga væl umtóktir millum fólk í øllum aldri.

Hann teknaði nógv frá barni av, og veturin 1958 -59 fekk hann fyrstu ferð listaliga vegleiðing á listaskúlanum, sum Ingálvur av Reyni, Jack Kampmann og Janus Kamban høvdu í Havn. Eftir tað fór hann til Danmarkar at læra til gullsmið.

Flestu javnaldrarnir á Viðareiði eru farnir, og tí kemur Vegghamar lítið út millum fólk. Men hann er djóravinur. Hann hevur havt kettur og hann gevur fuglunum at eta.

-Mær dámar best einsemi, at granska og at lesa bøkur, sigur 86 ára gamli Arnhold Vegghamar á Viðareiði, sum framvegis er virkin við penslinum.

Lagt til rættis: Jakob Jørgensen og Tórður Mikkelsen.

Agent 007 (Daniel Craig) livir eitt friðarligt lív á Jamaica. Men friðurin endar brádliga, tá hann fær vitjan av CIA-agentinum Felix Leiter (Jeffrey Wright), sum biður um hjálp. Tað snýr seg um at bjarga einum granskara, ið er tikin, men tað vísir seg skjótt at hava samband við tað ódámliga bølmennið Safin (Rami Malek), sum hevur fingið deyðiliga biologiska vápnið - sum bølmennið ætlar sær at brúka! Daniel Craig spælir leiklutin sum James Bond fyri seinastu ferð í hesum 25. Bond filminum. Í filminum er eisini danski sjónleikarin David Dencik við.
Upprunah.: No Time to Die
Leikarar: James Bond: Daniel Craig, Paloma: Ana de Armes og Lyutsifer Safin: Rami Malek. Við eru eisini: M: Ralph Fiennes. Madeleine Swann: Léa Seydoux. Valdo Obruchev: David Dencik. Blofeld: Christoph Waltz. Q: Ben Whishaw. Eve Moneypenny: Naomie Harris. Felix Leiter: Jeffrey Wright. Tanner: Rory Kinnear. Handrit: Neal Purvis, Robert Wade, Cary Joji Fukunaga og Phoebe Waller-Bridge eftir bøkur hjá Ian Fleming.
Leikstj.: Cary Joji Fukunaga.
Framl.ár: 2021
Framl.: MGM
Aldursmark: 11