SIC á W.E.T stage í dag

Rannvá Egholm
rannva@roddin.fo

Í mars var Wacken Metal Battle Føroyar hildið í Sjónleikarhúsinum, har átta føroyskir tungmálmsbólkar framførdu. Wacken Metal Battle Føroyar er eitt tónleikatiltak og ein undankapping til at sleppa at spæla á stóra týska festivalinum Wacken. At SIC skuldi umboða Føroyar í altjóða tiltakinum varð avgjørt tann 16. mars, tá ið tungmálmsbólkurin vann føroyska umfarið av tiltakinum. Vinnarin av hesu altjóða kappingini í fjør var umboðið úr Føroyum, Hamferð.

Framførslan hjá SIC verður klokkan 15:25 á W.E.T stage. Tá ið allir bólkarnir hava framført, verður síðani eitt finaluumfar, og besti bólkurn vinnur ein plátusáttmala frá týska risa plátufelagnum Nuclear Blast Records.

Á stóra festivalinum sleppa øll londini, ið eru við í kappingini, at hava eitt dómaraumboð, og í ár er tað Teitur Egholm Fossaberg. Teitur Egholm Fossabeg umboðar eisini saman við Fróða Tóralvssyni Stenberg, ið var føroyska dómaraumboðið á festivalinum í fjør, „Upp við Hornunum“, ið er ein áhugabólkur innan tungmálmstónleik.

Röddin ynskir SIC góða eydnu í dag!