BBC umrøðir føroysku kvinnufráflytingina

Unspoiled, Unexplored... Unmarried? Eftir at DR í sendingini Horisont mánakvøldið varpaði ljós á minkandi talið av kvinnum í Føroyum, umrøðir BBC nú eisini málið á heimasíðu síni. Í greinini Faroe Islands: Men 'must import brides' stendur m.a., at við einum undirskoti á 2000 kvinnum, eru føroyskir menn noyddir at innflyta sær útlendskar konur. 

Kvinnuundirskotið verður lýst sum ein trupulleiki, sum kann fáa sera álvarsligar fylgjur fyri føroyska samfelagið, og víst verður á, at síðan 2006 er talið av filipinskum kvinnum tvífaldað. Samanlagt eru í løtuni 200 teilendarar og filipinar í Føroyum, og harav er meginparturin kvinnur. 

Sendingin "Kvindeflugt fra Færøerne", sum varð víst á DR mánakvøldið, hevur verið undir hørðum atfinningum frá føroyingum, sum ikki kenna seg aftur í myndini, sendingin gav av føroyingum og trupulleikanum við fráflytingini. Greinin hjá BBC tekur støði í sendingini hjá DR. 

Hvat helt tú um sendingina hjá DR og nú eisini greinina hjá BBC? Skriva eina viðmerking niðanfyri.