Danir bergtiknir av 18 ára gomlum yrkjara

Tann 17. oktober gav Gyldendal yrkingasamling út, ið hevur vakt óvanliga stóran ans. Yrkingarnar hjá 18 ára gamla Yahya Hassan høvdu longu verið nakað umrøddar áðrenn útgávuna, og forlagið hevði væntað eitt aftursvar, men at yrkingarsamlingin varð so væl móttikin, høvdu tey ikki væntað, segði ritstjórin Simon Pasternak í samrøðu við Dr.

Framúrskarandi góður yrkjari og beinrakið mál, ljóðar aftursvarið frá danum, ið onkursvegna kenna seg aftur í yrkingunum hjá palestinaranum. Vanligt er, at tá ið ein yrkingasamling kemur út, at nøkur fólk ogna sær eitt eintak, onkur ummælir, og so dettur tað burtur aftur. At ein yrkingasamling fær so nógv umrøðu, og at fólk storma inn í bókahandlar fyri at sleppa at lesa kenslubornan skaldskap, hevur mann ikki sæð leingi.

Hetta er fyrstu ferð Yahya Hassan roynir seg í skaldskapi, og yrkingarnar eru skrivaðar í einum máli sum minnur um prosa. Yrkingarnar snúgva seg um uppvøksturin hjá palestinaranum, brotsverk, haturin mótvegis foreldrunum og harðskap. Fyri lættlesiliga og nágreiniliga málið, ið ikki skal týðast og avkotast, hava yrkingarnar fingið 5 stjørnur frá ummælarum, og Yahya Hassan er upp á fáar vikur vorðin heimskendur um alt kongaríkið.

Vanliga hevði Gyldendal einans prentað 300-400 eintøk, men vegna stóru umrøðuna, valdu tey beinanvegin at prenta 6000 eintøk, og alsamt fleiri eintøk verða prentað. Yvir 10.000 eintøk eru nú seld, og tað er neyvan nakar dani í løtuni, ið ikki kennur til 18 ára gamla yrkjaran.