Jólaveitsla fyri lesandi

Tá ið jóltíðin nærkast, og dagarnir styttast og gerast myrkari, tysja fólk til alskins jólaveitslur. Saman við næmingaráðum skipar Ó fyri jólaborðhaldi og gevur øllum lesandi í Føroyum møguleikan at møtast.

- Hugskotið kom fyri umleið 3 vikum síðani, og Hanus Samró setti seg síðani í samband við tey ymisku næmingaráðini runt í Føroyum. Vit vóru so nøkur næmingaráð, ið byrjaðu at samstarva við Ó og leggja borhaldið til rættis, sigur Bjarni Kárason Petersen, næstformaður í næmingaráðnum í Hoydølum.

Jólaveitslan er fyri øll lesandi í Føroyum - ikki einans fyri miðnámsskúlanæmingar, men fyri øll, ið eru undir útbúgving í Føroyum.

- Hetta er ein máti at samansjóða lesandi, fáa næmingarnar frá útjaðaranum við og samantvinna allar miðnámsskúlarnar í Føroyum. Torført er at siga, hvussu undirtøkan verður, og hvussu nógv fara at koma til eitt tílíkt tiltak, men vit vóna, at tað fer at eydnast væl, fortelur Bjarni Kárason Petersen.

Næmingaráðini, ið saman við Ó skipa fyri jólaborðhaldinum, eru ráðið í Hoydølum, Handilsskúlanum í Tórshavn, Studenta- og Handilsskúlanum á Kambsdali og Tekniska skúla í Klaksvík.

Jólaveitlsan verður í badmintonhøllini í Tórshavn 16. november. Veitslan fer at byrja so mikið tíðliga, at har fer at vera eitt ordiligt borðhald við mati, tónleiki og undirhaldi á skránni. Veitslan fer tó ikki at halda á alla náttina, men endar umleið klokkan 2, so at eisini verður møguleiki at fara í býin aftaná.

Kostnaður er 50 krónur, og her ber til at ogna atgongumerki. Gevið gætur, at tað er avmarkað nøgd.