Vinn eina viku á rithøvundaskúla í Svøríki!

“Lat tínar tankar í júst tey orð, tú hevur hug. Øll sløg av tekstum kunnu vera við í kappingini: ein yrking, ein stuttsøga, ein sangtekstur, ein uppskrift, ein hugleiðing, ein brúkaravegleiðing, ein sjónleikur, ein dreymur, eitt bræv…… Tað kann vera veruleiki eins væl og úr tínum egna hugflogi… Valið er títt!” soleiðis ljóðar felagsevnið fyri skrivikappingina, sum NÁM, Rithøvundafelag Føroya og Norðurlandahúsið skrivaði út í gjár.

Skrivikappingin er fyri ung í 9. flokki. Tveir ungir høvundar kunnu vinna eina ferð til Svøríkis í eina viku á rithøvundaskúla saman við øðrum ungum úr hinum Norðurlondunum. Tveir ungir høvundar kunnu vinna eitt árshald til bókaklubban Ung og 18-20 kunnu vinna sær pláss til sín tekst í bókaútgávu.

Freistin at senda sín tekst inn er 17. februar, men áðrenn tað hevur tú kjansin at fínpussa tínar skrivigávur, tí tann 24. janur skipar Norðurlandahúsið fyri kveikingardegi. Har fara føroyskir høvundar at hava skriviverksmiðjur fyri øllum áhugaðum 9. floksnæmingum.