Gestir komnir úr øllum Norðurlondum

Gvøðny Maria Áarstein og Ása Aðalsteinsdóttir

Føroyska Gvøðny og íslendska Ása ganga á vísulinjuni á Nordiska Folkehögskolan í Kungälv, og tær eru komnar beint úr Stockholm, har tær spældu konsert í gjár.

Tær skundaðu sær av flogvøllinum inn til Kongens Have fyri at hoyra Hanus G. Johannesen, ið eisini gekk á Kungälv í sínari tíð.

- Eg gleði meg mest at vísa Ásu teir føroysku bólkarnar, so sum Eivør og TÝR sigur Gvøðny á føroyskum, og Ása, sum fylgir við prátinum, svarar á svenskum:

- Somuleiðis verður stuttligt at vísa Gvøðny íslendskan tónleik so sum Bubbi Morthens.

Taitsiannguaq Tróndheim, Laura Maj Petersen, Avaruna Mathæussen og Kuka Lyberth

Øll fýra eru úr Grønlandi, og meðan hini trý búgva í Keypmannahavn, býr Laura í Aalborg.

Tey eru mest av øllum komin fyri at hoyra grønlendsku Nanook og Small Times Giants, men tey gleða seg eisini at hoyra bólkarnar úr hinum londunum.

- Eg kenni ikki hinar bólkarnar, men vónandi fer hesin festivalurin at lata eyguni á mær upp fyri onkrum nýggjum bólki, sigur Kuka. Vit hava júst hoyrt Signar í Homrum, og hann dámdi okkum ordiliga væl.

Tey eru øll aktiv í grønlendska lestrarfelagsskapinum Avalak, har tey eru von at skipa fyri grønlendskum tiltøkum. Á Frigg eru Great Greenland umboðað, men tey kundu hugsað sær at eisini sæð okkurt frá millum annað Bibi Chemnitz og Isaksen Design.

- Eg vóni, at tey hava turran fisk, sigur Taitsiannguaq, og hini leggja afturat:

- Og turran hval. Og spik. Og kóp. Og kópasuppu. Vit verða heilt svang bara av at tosa um tað, flenna tey hart.