Linda og Turið: Ball, góður matur og reytt pornoljós

í einum hugnaligum báti á ytstu bátabrúnni sita tvær vælhýrdar gentur, sum á fimta sinni búgva í báti á Summarfestivalinum.

-Hvørt ár búgva vit í báti, og vit elska tað! Tað er ikki bara á Summarfestivalinum, men eisini til onnur árlig tiltøk. Tað eru sjálvandi ikki bara vit báar, sum búgva her, men eisini foreldrini hjá Turið, og tað er so super hugnaligt. Hýrurin á bátabrúnni er í topp, og hvørt kvøld er ball í ymsu bátunum, so tað er bara at koma ein túr forbí.

Linda og Turið lata væl at bátalívinum, og maturin er serliga góður.

-Seriøst, maturin, sum vit gera umborð, er so góður. Fleiri keypa fastfood, og sita á tjaldingarøkinum og eta, men tað tíma vit bara ikki. Vit keypa heldur góðan og lekkran mat, sum vit matgera í bátinum, og tað er klassamunur á heimagjørdum mati og festivalmati. Í gjár koyrdu vit eina steik í ovnin, gjørdu eplabátar og eina geniala sós, skilur tú hvat eg meini? At sita innandurða, stearinljós á borðinum og heitan mat, einki er betur. Góður matur er nærmast vorðin siðvenja á festivalum.

Á ytstu bátabrúnni eru fleiri hugnaligir bátar, og eisini er báturin hjá Turið og Lindu avbera hugfarisligur.

-Tað er um kvøldið tað sker. Tað verður myrkt, stearinljós verða tendrað, og vit hava nakrar super fancy ljósketur í bátinum, sum veruliga betra um stemningin. Og ikki at gloyma, so hava vit reytt pornoljós á vesinum!

Fólk ganga framvið, og summi koma ein túr inn at vitja okkum. Tað er altíð hugnaligt á bátabrúnni, stutt sagt – eitt rimmar ball.

Við einari sjampanjufløsku í hondini, ynskja Turið og Linda øllum ein góðan Summarfestival.