Hetta vita vit um álopini í Keypmannahavn

Kl. 15.00 í gjár byrjaði ein kjakfyrilestur um skrivi- og talufrælsi. Umleið 50 fólk vóru til fyrilesturin. Svenski Muhammedteknarin Lars Vilks var til staðar. Fyrilesturin varð hildin í Kulturhúsinum ”Krudttønden” á Eysturbrúgv.

Kl. 15.30 verður kjakfyrilesturin avbrotin, tí ein byrjar at skjóta inn ígjøgnum rútarnar í Krudttønden. PET-fólkini, sum eru til staðar, gera skjótt av og fáa Lars Vilks avstað í eitt trygt rúm. Ein 55 ára gamal maður verður skotin og dripin. PET-fólkini, ið eru til staðar svara aftur, men drápsmaðurin nær at flýggja. Trý løgreglufólk verða særd.

15. februar kl. 00.43 byrjar ein at skjóta við synagoguna á Krystalgade mitt í Keypmannahavn. Í jødisku synagoguni eru fleiri fólk til staðar, tí ein konfirmatión verður hildin. Ein verður skotin í høvdið, og tvey løgreglufólk verða skotin í ávikavist armin og beinið.

Seinni verður váttað, at tann, sum bleiv skotin í høvdið, er deyður.

Kl. 01.12 verður Nørreport evakuerað.

Kl. 05.25 greiðir danska løgreglan frá, at tey hava skotið og rakt ein mann á Nørrebro statión. Løgreglan váttar síðani, at maðurin er deyður, og at maðurin ivaleyst er drápsmaðurin.

Løgreglan hevur nú eyðmerkt mannin, sum var skotin í nátt, og danska løgreglan er rættiliga vís í, at hetta er maðurin, sum hevur skotið bæði við Kulturhúsið og við synagoguna.

Les eitt yvirlit her:http://www.dr.dk/Nyheder/Indland/2015/02/14/225734.htm

Les eisini: http://kvf.fo/roddin/greinar/2015/02/15/valentine-endadi-vid-skotbardaga