Eivør klár við nýggjari útgávu

Eivør hevur júst kunngjørt, at nýggja fløgan, sum kallast Slør, verður tøk í næstum. Í februar gav Eivør ensku fløguna Bridges út, og er Slør sostatt næsta fløgan, ið verður útgivin í ár. Sambært danska blaðnum, Gaffa, kemst hetta av, at fløgurnar eru tætt knýttar og eru meira sum systrafløgur heldur enn einstakar útgávur.

Les eisini: Ummæli: Eivør - Bridges

 "Tá eg skrivaði sangirnar, komu teir til mín á tann hátt, at um eg skrivaði ein tekst á enskum, so fylgdi ein føroyskur tekstur beint aftaná - eins og var tað eitt slag av spegilsmynd. Flestu sangirnir eru skrivaðir saman tveir og tveir," greiddi Eivør frá um systrafløgurnar í eini fráboðan til fjølmiðlarnar, har hon eisini kunngjørdi sína konsertferð í Danmark.

Les eisini: Alt rørist: Eivør/Ginman

Áðrenn songkvinnan fer víðari á konsertferð í Danmark, verður skipað fyri ókeypis útgávukonsert í Mentanarhúsinum í Fuglafirði 30. august kl 20:00, har Marius Ziska kemur at hita upp.  

Her hoyrir tú live-upptøku av sanginum 'Bridges', ið er av fløguni við sama heiti.