Fleiri føroyingar tilnevndir til GAFFA-virðislønina

Í gjár almannakunngjørdi GAFFA eitt yvirlit yvir øll tey tilnevndu til GAFFA-virðislønina 2015. Tey tilnevndu eru millum 25 og 50 tónleikarar í hvørjum bólki av í alt 17 bólkum.

Eivør Pálsdóttir hevur givið tvær fløgur út í ár, Bridges og Slør, og hon er tilnevnd fyri báðar í fleiri bólkum í donsku virðislønini. Báðar fløgurnar eru tilnevndar í Årets Danske Album, Årets Danske Kvindelige Kunstner og í Årets danske Pop-udgivelse.

HULDA er eisini tilnevnd í einum bólki í donsku virðislønini við fløguni HULDASound, nevniliga í bólkinum Årets Danske Elektroniske Udgivelse.

Føroyski Bárður Reinert Poulsen er eisini tilnevndur í norsku GAFFA-virðislønini. Hann er tilnevndur við bólkinum The Fjords í Årets Norske Nykommer, Årets Norske Soloartist og í Årets Norske Album.

Atkvøð fyri tínum yndis bólki ella einstaklingi á Gaffa.dk/prisen og síggj øll, sum eru tilnevnd í 17 ymsu bólkunum. Norska atkvøðugreiðlsan er at finna her.