List um veðurlagsbroytingar

Fríggjadagin og leygardagin verður listaframsýning í nýggja bygninginum hjá Bank Nordik í Havn. Tað eru næmingar á nýggju Masters útbúgvingini, West Nordic Studies, á Fróðskaparsetrinum, ið hava skipað fyri tiltakinum. 

Veðurlagsbroytingar

Evnið, ið listaframsýningin viðger, eru tær veðurlagsbroytingarnar, sum longu eru farnar at merkjast í útnorðri og kring heimin. Serliga verður varpað ljós á ovurnýtslu av tilfeingi, dálking, Co2 útlát, men eisini verður dentur lagdur á, hvat vit kunnu gera fyri at bøta um teir skaðar, sum longu eru hendir.

Fleiri føroysk listafólk

Á listaframsýningini verða verk hjá fleiri føroyskum listafólkum sýnd fram, m.a. eru Bárður Dal Christiansen, Livar Nysted, Lilliane Svøðstein, Selma Ellingsgaard, Ronja Nysted, Marita Vestergaard, Astrid Andreassen, Ole Wich, Vigdis Petersen, Rannvá Holm Mortensen og Helena Maria Weihe við. 

Men eisini verða listaverk hjá næmingum í 4 - 8. flokki í Skúlanum á Fløtum sýnd fram. 

Framsýningin er almenn og verður 27. november frá kl 10 - 15 og 28. november frá kl. 13 - 16.