- Tíðindi, mentan og ítróttur
Summarmorgun
![](https://kvf.fo/sites/default/files/styles/podcastmyndir/public/summarmorgun_0.png?itok=EqtZ7Q6E)
- Eg haldi saktans, at tú kanst síggja leikin uttan at hava lisið bókina.
Carl Johan Jensen, rithøvundur, heldur tað vera eitt bragd, at leikbólkurin Tvazz hevur fingið so nógv við úr bókini "Ó - søgur um djevulskap", nú bókin er gjørd til leikrit, sum verður framført í Norðurlandahúsinum hesa vikuna.
Leikurin byrjar við, at spurt verður út í salin, hvør hevur lisið bókina úr enda í annan. Og tað var ein greiður minniluti, sum rætti hondina upp, men tað nervar ikki Carl Johan Jensen.
Bókin "Ó - søgur um djevulskap er slakar 800 síður, og umframt søgurnar eru viðmerkingar, notur og ávísingar ein partur av eksperimentandi bókini. Tí er tað nærum eitt óðamannaverk at fara undir at gera bókina til sjónleik. Men tað eydnast merkiliga væl, heldur rithøvundurin sjálvur.
- Tað er sum at royna at gera ein leik burtur úr Færøsk Anthologi. Tað ber til, men so mást tú finna onkran tráð ígjøgnum. Og tað er akkurát tað, tey gera. Tey hava lisið søgurnar, funnið ein tráð og gera so ein leik burturúr. Eg haldi tað vera undranarvert í veruleikanum, hvussu nógv tey hava fingið við úr bókini av andanum og teimum grundleggjandi spurningunum, sum verða settir í bókini um óndskap, sigur Carl Johan Jensen.
Bókin snýr seg um óndskap, og tað, sum Tvazz framførir, er reinur djevulskapur á palli.
Hoyr samrøðuna við Carl Johan Jensen um leikin, bókina og óndskap.
![](https://kvf.fo/sites/default/files/styles/news_xtra_xtra_large_2/public/summarmorgun_0.png?itok=Ynsc3SFq)