Í løtuni eru 20 útlendingar úr 10 ymiskum londum á summarskeiði á Føroyamálsdeildini á Setrinum, har teir savnast um áhugan fyri føroyskum máli.
Umframt undirvísing í føroyskum máli eru fyrilestrar um føroyska mentan og samfelagsviðurskifti, og skipað verður eisini fyri útferðum.
Føroyamálsdeildin hevur skipað fyri hesum summarskeiðunum í nógv ár, og skeiðini hava verið sera vælumtókt, og umsóknirnar nógvar, sigur Zakaris Svabo Hansen, útbúgvingarleiðari á Føroyamálsdeildini, sum saman við Brynhild Kamban samskipar summarskeiðið í ár. Hann vísur á, at nøkur teirra, ið hava luttikið á skeiðunum farnu árini, í dag eru góðir týðarar av føroyskum bókmentum til onnur mál, og at skeiðini yvirhøvur hava verið við til at fingið føroyskum máli og bókmentum góð umboðsfólk í øðrum londum.
Luttakararnir í ár koma úr eitt nú Týsklandi, Eysturríki, Ungarn, Póllandi, Fraklandi, Taivan, Onglandi og USA, og summarmorgun tosar við Samiu Djeffane úr Týsklandi, Tadeusz Rieckman úr Ungarn og Georges Talbot úr Fraklandi.
Tey trý vísa á, at ein orsøk til, at tey teknaðu seg til skeiðið, er, at føroyska málið er serstakt:
- Talan er um eitt lítið mál, ið er ment á fjarskotnum oyggjum, og tað ger málið forkunnugt og áhugavert, siga tey. Luttakararnir eru eisini áhugaðir í føroysku mentanini og náttúruni, og halda, at tað er gott at kunna kjakast um málsligar spurningar við onnur, ið hava sama eldhuga fyri føroyskum máli.
Men tað er ikki bert luttakararnir, ið fáa nakað burturúr skeiðnum. Lena Reinert, vísindaligt hjálparfólk og undirvísari á summarskeiðnum, sigur, at mongu kvalifiseraðu spuningarnir frá luttakarunum hava við sær, at hon má kanna málsligar spurningar og viðurskiftir, ið hon ikki hevur hugsað um fyrr, og tað er stuttligt og mennandi, heldur hon.
Lurtið eftir samrøðuni við Samiu, Tedeusz og Georges, Zakaris Svabo Hansen og Lenu Reinert.
