Djór hava leingi verið nýtt, at hjálpa fólkum við ymsum avbjóðingum. Tey flestu kenna eitt nú blindahundar, men hundar kunnu eisini nýtast at hjálpa fólki við sjúkuni epilepsi.

Eini 500 føroyingar liva við epilepsi, og hetta er sjúka, sum kann hava stóra ávirkan á gerandisdagin.

Ein teirra, ið hevur sjúkuna, er Karis í Liða Hansen. Hon hevur sera ringa epilepsi, sum ger, at hon fær ógvuslig herðindi, sum millum annað hava við sær, at hon javnan má liggja á intensivari deild fyri at fáa hjálp. 

Tær viðgerðir, Karis hevur roynt, hava ikki hjálpt nóg væl. Men nú er kanska ein vón at hóma, tí hon hevur fingið játtað ein epilepsihund, sum væntandi við tíðini kann hjálpa henni.

Lurtið eftir nemandi samrøðuni, har Karis fortelur um sína sjúku, hvussu hon ávirkar lív hennara og um hundin Olaf, sum hon nú hevur fingið.