- Tíðindi, mentan og ítróttur
38 ára gomul fyritøka gevst og fer upp í aðra
Tvey arkitektavirki hava lagt saman.
Arkitektavirkið hjá Selmari Nielsen, SNA, hevur í síðstu viku yvirtikið virksemið hjá Árna Winther Arkitektum.
Nøvnini SNA og Árni Winther Arkitektar fara eina tíð at verða brúkt sum felags búmerki.
Stjóri í nýggju fyritøkuni verður Selmar Nielsen.
Árni riggar av
Í tíðindaskrivi siga virkini bæði, at endamálið er at savna royndir og førleikar í einum sterkum føroyskum arkitekta- og ráðgevingarvirki, sum bæði skal kunna kappast í Føroyum og uttanlands.
SNA og Árni Winther Arkitektar hava arbeitt saman um stórar verkætlanir í nógv ár. Nevnast kunnu Vága floghavn, Landssjúkrahúsið og Sundsverkið.
Árni Winther læt arkitektastovu upp í Føroyum í 1979. Árni Winther heldur fram sum arkitektur í nýggju fyritøkuni.
Átta fólk starvaðust hjá Árna Winther Arkitektum. Tey halda øll fram hjá SNA, har 18 fólk eru frammanundan.