- Tíðindi, mentan og ítróttur
Óneyðugt at broyta lógina um kannabis
Tað er óneyðugt við eini royndarskipan í Føroyum við medisinskum kannabis. Tí sum nú er hava sjúklingar við serligum tørvi rættiliga góðar møguleikar at fáa kannabis-heilivág frá lækna.
Tað sigur landsstýriskvinnan í heilsumálum, Sirið Stenberg úr Tjóðveldi.
Løgtingið skal annars í februar viðgera, um fólk skulu kunna fáa kannabis sum heilivág. Tað er Jenis av Rana, tingmaður fyri Miðflokkin, sum hevur lagt uppskot til samtyktar fyri tingið, um at løgtingið heitir á landsstýrið um at leggja fyri Løgtingið uppskot til løgtingslóg um eina royndarskipan viðvíkjandi nýtslu av medisinskum cannabis.
Men Sirið Stenberg heldur, at uppskotið er óneyðugt.
- Læknar í Føroyum hava longu heimild at útskriva kannabis-heilivág. Vit hava viðgjørt spurningin saman við landslæknanum og landsapotekaranum. Niðurstøðan hjá okkara fakmyndugleikum er, at innanfyri ta skipan, sum vit hava í dag, hava vit heimild at hjálpa teimum sjúklingum, sum hava tørv á kannabis-heilivági, sigur Sirið Stenberg.