Trý fólk fáa starvslønir

Nevndin hevur gjørt av at veita trimum umsøkjarum listafólkaløn í trý ár, so tey burturav kunnu arbeiða við list innan tónleik, myndlist og bókmentir.

Fyri tónleik var tað Jens L. Thomsen, sum fekk listafólkalønina. Fyri myndlist var tað Ragnhild Hjalmarsdóttir Højgaard og fyri bókmentir var Carl Jóhan Jensen.

26 umsóknir komu inn

Endamálið við listafólkalønunum er at bøta um umstøðurnar hjá yrkislistafólkum. Tey, sum fáa listafólkaløn, kunnu ikki røkja annað fast starv meðan tey fáa listafólkaløn.

Listafólkini kunnu hava inntøkur av teirra skapandi virksemi. Upphæddin á eini listafólkaløn er á sama stigi sum ein læraraløn á lønarstigi 21.1.

Tað svarar til umleið 28.000 krónur um mánaðin, umframt 17 prosent í eftirløn.