Grønland fyrireikar handilsavtalu við Bretland

Grønland ætlar at hava eitt uppskot um handilsavtalu við Bretland klárt í vár. Tað sigur grønlendski umboðsmaðurin í Brússel, Mininnguaq Kleist, við KNR.

- Bretland er ein av størstu marknaðunum í ES fyri grønlendskar fiskavørur, og tí hevur ein handilsavtala stóran týdning, sigur hann.

Bretland fór úr ES seinast í januar, men tær avtalur, sum vóru galdandi, vera galdandi alt hetta árið, og tí vera ongar broytingar alt fyri eitt, sigur hann.

Framtíðin verður eitt sindur øðrvísi, og tí er neyðugt hjá Grønlandi at gera eina avtalu við Bretland sum skjótast.

Gera uppskot

Grønlendsk embætisfólk skulu fyrst gera eitt uppskot um eina handilsavtalu at leggja fyri bretsku myndugleikarnar, og so kemur politiska arbeiðið at fáa avtaluna góðkenda, sigur Mininnguaq Kleist.

Tað eru serliga rækjur og toskur, sum bretar keypa úr Grønlandi. Hóast eingi neyv tøl eru fyri útflutningin, so verður mett, at talan er um útflutning fyri 600 til 700 milliónir kr til bretska marknaðin um árið, sigur umboðsmaðurin.

Grønland miðar eftir at fáa eina líknandi avtalu, sum landið hevði við ES, tá Bretland var limur har. Men spurnignurin er, um talan kann verða um at leggja toll á grønlendskar vørur, og tað verður ikki greitt, fyrr enn ES og Bretland hava gjørt eina handilsavtalu.

- Sum er hava bretar lagt ætlanir um at leggja toll á grønlendskar vørur, sigur grønlendski umboðsmaðurin í Brússel við KNR.