Thorning skrivar út nýval

Kl. 11 í dag (danska tíð), segði danski forsætisráðharrin Helle Thorning-Schmidt á einum tíðindafundi, at danska fólkatingsvalið verður tann 18. juni.

Gitingar hava leingi verið um, nær hon fór at skriva út nýval – um valið fór at liggja áðrenn ella aftan á summarfrítíðina – so hetta kemur ikki óvæntað.

Sjálvt um socialdemokratarnir við Thorning á odda hava klárað seg lutfalsliga væl í seinastu veljarakanningunum og hava klárað seg betur enn Venstre við Løkke á odda, so hava næstan allar veljarakanningarnar víst, at blái blokkurin stendur sterkastur. Seinasta kanningin, sum DR gjørdi mitt í mai, vísti, at reyður blokkur fær 47,7 prosent, ímeðan bláur blokkur fær heili 52,2 prosent av øllum atkvøðunum. Men enn er einki víst.

Á fólkatinginum sita Sjúrður Skaale fyri Javnaðarflokkin og Edmund Joensen fyri Sambandsflokkin, so danska fólkatingsvalið ávirkar eisini føroyingar. Vit skulu eisini á val tann 18. juni, har vit skulu taka støðu til teir báðar sessirnar, sum føroyingar hava á fólkatinginum.