Soleiðis gert tú turra grind

Í gjár legði ein stór grind á 135 hval beinini í Hvannasundi, so í dag hava nógv skorið upp og gjørt til. Hóast tú ikki nært at fáa turra grind á ólavsøkuborðið í ár, so verður aftur ein ólavsøka næsta ár, og um tú ikki dugir at gera turra grind til, so kanst tú læra tað her og hava turra grind á borðinum til næstu ólavsøku.

• Fyrst skalt tú skera tvøstið í lykkjur á stødd við ein góðan yvirarm. Tvøstið skal ikki vera óslætt og holutt, og tú skalt eisini skera spengurnar burtur – tær eru lættar at síggja, tí tær eru hvítar, og tvøstið myrkareytt.

   

• Um summarið er kanska heldur heitt og ov nógvar flugur til at hanga lykkjurnar út at turka. Tískil kanst tú, um tú ert ein av teimum, sum var í grind í gjár, pakka lykkjurnar í plastposar, og frysta tær til fyrst í oktobur, ella til tá tú hongur seyðakjøt upp.

• Tá tú tekur tær upp aftur úr fyrstiboksini, skalt tú stroya salt á eitt pappstykki, og leggja tað á eitt kjallaragólv. Legg síðani lykkjurnar hvør oman á aðra á pappið, og stroy salt ímillum og omaná. Um tú hevur seks lykkjur, so kanst tú leggja tær tríggjar og tríggjar í tvey røð. Lat tær liggja soleiðis í einar átta tímar. Hetta er fyri at fáa blóðvatn úr.

• Eftir átta tímar skalt tú turka saltið av lykkjunum.

• Síðani skalt tú koyra vatn og ein neva av salti í eina spann og dyppa lykkjurnar í – ikki meiri enn eini 10 sekund.

• So skulu lykkjurnar út at hanga. Hetta gert tú við eitt nú at krøkja ein húk væl í tvøstið, so tað ikki slitnar og dettur niður. Hang tær eitt nú á eitt træ uttan fyri húsini ella í ein hjall.

• Koyr síðani hendurnar aftur í saltvatnið og kín lykkjunum við tí. Endurtak hetta 1-2 ferðir um dagin fyrstu fýra dagarnar. Hetta er fyri at fáa lykkjurnar slættar.

• Nú skulu lykkjurnar hanga í frið í einar 6-8 vikur alt eftir, hvussu tjúkkar tær eru. So er bert eftir at skera í tunnar flísar og eta.

Vælgagnist!