- Tíðindi, mentan og ítróttur
Athena og Poseidon fáa helst makrel
<div>Leisturin fyri makrelbýtið er lagdur, og tey 134.000 tonsini eru býtt millum skipabólkarnar. </div><div><br></div><div>Politiski boðskapurin hjá landsstýrinum hevur verið, at øll skulu hava part í makrelinum hesaferð. Og landsstýrið er farið so langt, at Fiskimálaráðið hevur gjørt ein heilt nýggjan skipabólk, sum eisini skal hava rætt til sín part av makrelinum í summar. Talan er um skipabólkin, ið hevur fingið heitið "verksmiðjuskip". </div><div><br></div><div>Hesin bólkur er umrøddur í "uppskotinum til kunngerð um skipan av fiskiskapinum eftir makreli við fiskiførum undir føroyskum flaggi í 2012". Í grein 3, stykki 5 í kunngerðini er bólkurin lýstur sum trolarar, ið hava veiðiloyvi til fiskiskap í altjóða sjógvi, og trolarar, hvørs fiskirættindi eru avmarkað til fiskiskap í altjóða sjógvi. </div><div><div><br></div><div>Hesin bólkur, "skip, hvørs fiskirættindi eru avmarkað til fiskiskap í altjóða sjógvi", skal sambært kunngerðini hava rætt til at fiska 6.000 tons av føroysku makrelkvotuni. Sambært Fiskimálaráðnum er talan um gomlu, fyrrverandi skipini hjá Thor - Athena og Poseidon - sum framvegis hava síni loyvi. </div><div><br></div><div>Rógvi Reinert, aðalstjóri í Fiskimálaráðnum, vísir á, at spurningurin um bólkin "verksmiðjuskip" er viðgjørdur í politiska fylgibólkinum, sonevnda makrelbólkinum. Og tvinnar orsøkir eru til, at skipabólkarnir eru soleiðis, sigur hann: - Kappingaratlitið, ið skal forða fyri olympiskum fiskiskapi. Og at spjaða virkisøkið millum so nógvar skipabólkar sum tilber.</div><div><br></div><div>Tilsamans átta skipabólkar sleppa at fiska tilsamans 122.000 tons av makreli. Eftir eru so 12.000 tons til Havstovuna, til vinnuligar makrelroyndir og til landsstýrismannin at ráða yvir.</div><div><br></div><div>Sambært uppskotinum til kunngerð er freistin at søkja um loyvið at fiska makrel í summar sett til 1. juni. Sambært Rógva Reinert, aðalstjóra, fer tað at taka Fiskimálaráðnum tvær vikur at avgreiða allar makrelumsóknirnar. Tað hevur við sær, at komið er út í hálvan juni, áðrenn skipini vita, um tey sleppa at fiska makrel og hvussu nógv tey fáa.</div></div>
