Noktar seg sekan í ákæru um neyðtøku

Føroyingurin, sum er fyri rættinum í Amsterdam, noktar seg sekan í ákæruni um at hava neyðtikið eitt pinkubarn

Rætturin í Amsterdam viðger í hesum døgum eitt mál um kynsliga misnýtslu av børnum, har ein føroyingur eisini er ákærdur

13.06.2012 - 20:25

Í sambandi við málið um 38 ára gamla føroyingin, sum við dómstólarnar í Amsterdam er skuldsettur fyri kynsliga misnýtslu av børnum, kunnu lurtarar og hyggjarar hava fingið ta fatan, at maðurin hevur játtað seg sekan í at hava neyðtikið eitt barn, yngri enn eitt ár.Tað er rætt, at maðurin játtaði seg sekan í at hava neyðtikið pinkubarnið, tá hann varð handtikin. Men tá málið varð lagt fyri dómstólarnar, broytti maðurin støðu og noktar seg nú sekan í hesi ákæru.Hann játtar seg tó sekan í at hava tikið niður av netinum og havt í varðveiðslu barnapornografiskt tilfar. Men hann noktar seg sekan í at hava givið tilfarið víðari til onnur.