Politikarar viðgera nú Sandoyartunnilin

Nú partafelagið Eysturoyartunnilin nærkast løgtinginum, er eitt annað tunnilsfelag komið undan kavi.

Góð fýra ár eftir, at lógin kom í gildi, og tvær vikur, áðrenn lógin um Eysturoyartunnilin fer í løgtingið, er tunnilsbólkurin, sum er settur at viðgera Suðurleiðina, kallaður á fund mánadagin at viðgera partafelagið Sandoyartunnilin. Løgtingið samtykti á vári í 2009, at landsstýrismaðurin í innlendismálum kann stovna partafelag at gera og reka tunnil millum Streymoynna og Sandoynna. Landið skal einsamalt eiga partafelagið.

Annika Olsen, sum tá var landsstýriskvinna í innlendismálum, átti lógarupskotið. Samstundis sum lógin um P/f Sandoyartunnilin kom í gildi fór lógin frá 2007 um farleið millum Streymoy, Sandoy og Suðuroy, fyrsta byggistig, úr gildi. Hóast lógin um P/f Sandoyartunnilin kom í gildi síðst í mai í 2009, er einki partafelag komið enn.

Allir flokkar umboðaðir

Umboð fyri allar flokkar Samgonguskjalið hjá sitandi samgongu sigur, at í seinasta lagi 1. apríl í fjør skuldi ein politiskur fylgibólkur koma við tilmæli um Sandoyartunnilin. Men tann bólkurin, ella ein bólkur at viðgera alla Suðurleiðina, ikki bara Sandoynna, varð ikki settur fyrr enn í vár, tá løgmaður bað um at fáa bólkin settan. Bólkurin er ikki liðugur enn.

ç Fimm milliónir eru settar av til Sandoyartunnilin í 2015 í langtíðarløguætlanini hjá landsstýrinum. Tað hevur ikki eydnast útvarpinum at fáa orð á Kára P. Højgaard, landsstýrismann, í dag.