Føðideildin: Tryggleiki má veitast borgarum í Suðuroynni

Verður føðideildin á Suðuroyar sjúkrahúsi verður niðurløgd, má støða til eina og hvørja tíð takast til, hvussu besti tryggleiki verður veittur borgarum í Suðuroynni. Tað heldur Ronnie Midjord, stjóri á Suðuroyar sjúkrahúsi. 

Karsten Hansen, landsstýrismaður er nú farin at kanna, um føðideildin á Suðuroyar sjúkrahúsi skal leggjast niður, eins og gjørt varð við føðideildina á Klaksvíkar sjúkrahúsi í 2010. Men sama hvat verður gjørt, eigur trygdin hjá borgarunum í Suðuroynni at havast í huga, ger Ronnie Midjord, stjóri á Suðuroyar Sjúkrahúsi, vart við í hoyringarsvari til Heilsumálaráðið, sum Kringvarpið hevur fingið innlit í.

Kvinnur fara altið at eiga

Í hoyringarsvarinum til Heilsumálaráðið í apríl í ár, tekur Ronnnie Midjord ikki fakliga støðu til, hvat rættast er at gera, t.e. um føðideildin á Suðuroyar sjúkrahúsi skal leggjast niður ella ikki, men sjúkrahússtjórin, skrivar,

"...uttan mun til hvat gjørt verður, so vil tað eftir míni bestu sannføring altíð fara at koma fyri, at føðingar fara at verða her á staðnum við jøvnum millumbilum, og havandi í huga ta fjarstøðu, vit liggja í, má tað til eina og hvørja tíð takast støða til, hvussu besti tryggleiki verður veittur borgarum her í oynni."

Útvarpið hevur í dag roynt at fingið eina viðmerking frá Ronnie Midjord, sjúkrahússtjóra, men tað hevur ikki eydnast.