Útlendingar kunnu nú verða limir í MFS

Hetta varð einmælt samtykt, tá MFS herfyri hevði aðalfund.

Grundgevingin var, at tað er ein náttúrlig uppgáva hjá MFS at stuðla øllum lesandi í Føroyum.

Aðalfundurin heitt eisini á ráðið at arbeiða fyri, at studningurin til føroysk lasandi hækkar, verður prístalsviðgjørdur, og at ein fær studning 12 mánaðir heldur enn 11.

Harumframt vil aðalfundurin, at MFS skal arbeiða fyri, at ÚSUN ikki verður umlagt til lán, eins og rentan á lestrarlánum skal lækkast.

At enda heitti aðalfundurin á ráðið at skipa fyri eini árligari kanning av liviumstøðunum hjá lesandi í Føroyum.

Nýtt ráð
Á aðalfundinum var eisini nýtt ráð valt. Fýra teirra, sum vóru við í gamla ráðnum, stillaðu ikki upp aftur. Hesi vóru Teitur Vágadal, Martin Mohr Olsen, Hallur av Rana og Maria Ziskason Nesá.

Tíggju fólk vórðu vald í nýggja MFS-ráðið, fimm teirra nývald. Tey nývaldu eru Eirikur Sanderson, Guðrið Poulsen, Heidi á Lakjuni, Lív Egilsdóttir Olsen og Oda Strøm.

Ráðið hevur annars skipað seg við Regini Berg sum formanni, Birita í Dali sum næstforkvinnu, Marin Helena Hentze sum kassameistara og Odu Strøm sum skrivari.