Strangari reglur fyri sóllampur

Á nýggjárinum verður forboðið at selja fólki, sum eru yngri enn 18 ár, solariumsól til kosmetiskt endamál, sum tað stendur í lógini.

Men loyvt verður framvegis at selja tíð undir sóllampum at viðgera sjúkur við. Ein solariumlóg er á veg í løgtingið.

Endamálið við lógini er at minka um heilsuvandar og heilsuskaðar, sum kunnu standast av at sóla sær í sólarlampuljósi.

Sambært lógaruppskotinum. sum er sent til hoyringar, er sól til kosmetiskt endamál solariumsól, sum hevur til endamáls at strála menniskju við ultraviolettari stráling, og sum í høvuðsheitum er ætlað at gera húðina brúna.

Millum annað í fyrstu føroysku krabbameinsætlanini frá 2009 verður mælt til forboð fyri at lata ung, yngri enn 18 ár, sleppa at brúka solarium.

Í nógvum londum er 18 ára aldursmark fyri sóllampum, millum annað í nøkrum Norðurlandalondum, Íslandi, Norra og Finnlandi.

Sambært lógaruppskotinum skulu støð, sum selja solariumsól til kosmetiskt endamál, vera mannað.

Lógin fer tí at hava við sær eykaútreiðslur hjá ómannaðum sólstovum.