Breddin

Breddin: Fiskidagar stýrast eftir umsitingarætlan
22-09-2020
Landsstýrismaðurin í fiskivinnumálum fær nú neyðugu lógarheimildina, einsamællur at áseta fiskidagarnar eftir eini umsitingarætlan.

Landsstýrismaðurin í fiskivinnumálum fær nú neyðugu lógarheimildina, einsamællur at áseta fiskidagarnar.Tað verður gjørt eftir eini umsitingarætlan, sum ein arbeiðsbólkur lat úr hondum í mai mánaða í fjør.

Lógaruppskotið - sum gevur honum hesa heimildina - er farið til hoyringar, og broytingin skal koma í gildi fyri fiskiárið, sum byrjar á nýggjárinum.

Eitt grundprinsipp í umsitingarætlanini er sonevnda veiðireglan, sum sigur, hvussu árliga fiskidagatalið verður ásett. Frágreiðingin lýsir veiðiregluna sum eitt slag av tilbúgving, sum sigur, at okkurt skal gerast, tá ávaringarljósini lýsa.

Tvey tilvísingarvirði eru í veiðiregluni - gýtingarstovnurin og veiðilutfallið.

Gýtingarstovnurin er tann parturin av einum fiskastovni, ið er gýtingarførur. Veiðireglan leggur upp til, at fiskidagatalið verður skert, um gýtingarstovnurin er niðan fyri ásetta lágmarkið í veiðiregluni. Er stovnurin væl fyri og royndin óbroytt, verður fiskidagatalið óbroytt ella hækkað. Veiðilutfallið er veiða í mun til fiskibaran stovn. Hetta er eitt slag av ”harvest rate”. Fiskibarur stovnur er biomassin av 3+ ára gomlum toski og hýsu, ella biomassi av 4+ ára gomlum upsa. 

Og sum tað síðsta er eisini ein stabilitetsregla inni í umsitingarskipanini. Tað merkir, at fiskidagatalið kann bert stillast við fimm prosentum í mun til fiskiárið frammanundan - tað veri seg uppeftir ella niðureftir - hóast støðan kann tala fyri størri inntrivum. Endamálið við hesum er at hava ávísan stabilitet í kørmunum og veiðimøguleikunum.

Men umsitingarætlanin er ikki uttan lýti, staðfestir Petur Steingrund, fiskifrøðingur á Havstovuni, sum sjálvur var við í arbeiðnum at gera tilmæli um umsitingarætlan. 

Fyri tað fyrsta er støðan hjá fiskastovnunum broytt ídag, sammett við í fjørvár, tá umsitingarætlanin varð skrivað. Sambært Vørn eru fleiri fiskidagar inni í bólki-3, bólki-4A, bólki-4B og bólki-4T í ár, sammett við í fjør, tá umsitingarætlanin varð gjørd.

Eitt annað lýti við umsitingarætlanini er, at hon er ikki eftirmett av altjóða fiskirannsóknarstovninum ICES. Praktiski týdningurin er lítil og eingin, tí føroysku myndugleikarnir áseta einsamællir fiskidagarnar.

-Kortini átti umsitingarætlanin at verið eftirmett av ICES beinanvegin, heldur Petur Steingrund.

Arbeiðsbólkurin, sum hevur gjørt uppskot til umsitingarætlan, varð settur á heysti í 2018. Tá var politiski viljin í landsstýrinum at fara frá fiskidøgum til kvotur. Men politisku vindarnir vendu, og fiskidagaskipanin varð varðveitt.

Arbeiðsbólkurin skuldi eisini eftirmeta fiskidagaskipanina og aðrar reguleringar í fiskiskapinum eftir botnfiski í føroyskum sjógvi. Men hetta arbeiðið bleiv ikki gjørt. Stundir og arbeiðsorka vóru ikki til tað, ljóðaði frágreiðingin, tá arbeiðsbólkurin lat sína frágreiðing úr hondum í mai 2019.

Tí verður umsitingarætlanin løgd omaná eina fiskidagaskipan, sum ikki er eftirmett.

-Og tað er spell, heldur Petur Steingrund, fiskifrøðingur:

Samanumtikið - hóast nevndu lýti við umsitingarætlanini - er Petur Steingrund tó nøgdur við umsitingarætlanina.

Tí, sum hann speiskliga tekur til - alternativið er nógv verri:

Trýst á pílin undir myndini fyri at hoyra samrøðu við Petur Steingrund. 

Breddin

Sending um aktuel evni, sum verður send týsdag, mikudag, hósdag og fríggjadag klokkan 10.00.
Evnið í sendingini er Ríkisfelagsskapurin, har formenninir í Tjóðveldi, Sambandsflokkinum, Javnaðarflokkinum og Fólkaflokkinum eru í útvarpsstovuna og kjakast
18-04-2024
Ein søgulig semja tvørtur um miðjuna. Tað bleiv sagt um semjuna um tøkugjøld. Men hvat merkir nýggja semjan fyri inntøkurnar hjá landinum? Og hví er hendan loysnin betur?
16-04-2024
Evnið í Breddanum er ætlanin hjá landsstýrismanninum í fiskivinnumálum at lóggeva alt av fiskinum til lands. Kjak verður millum umboð fyri andstøðu og samgongu í Vinnunevndini
12-04-2024
Tvey evni vóru í sendingini.
11-04-2024
Fyri fyrstu ferð nakrantíð er norðurlandaráðsfundur í Føroyum. Breddin var við, tá tosa var um trygd og verju og støðu Føroya í Norðurlandaráðnum
09-04-2024
Hava rúsevni fingið fastatøkur í samfelagnum, og ger politiska skipanin nóg mikið at basa smuglingini, verður spurt í sendingini í dag
05-04-2024
Í sendingini í dag viðgera vit eisini Helsingfors-sáttmálan um Norðurlandaráðið, sum nú verður dagførdur
04-04-2024
Vit eru ikki samd um grunnleggjandi premissið og tað eyðkennir kjakið um fosturtøku
26-03-2024
Í juni skulu evropearar á val og sjáldsom steinsløg seta Arktis á alheims pallin
22-03-2024
Í sendingini greiðir kvinna frá, at hon trý ár eftir, at hon bað um hjúnaskilnað framvegis er gift og fíggjarliga heft at makanum
21-03-2024
Kjak er í útvarpsstovuni um førda fíggjarpolitikkin og javnstøðu, og so verður hugt at møguleikanum fyri kommunusamanlegging í Suðuroy
19-03-2024
Føroyar fingu í gjár á fyrsta sinni vitjan av toppinum í ES.
15-03-2024