Løgreglan flytur í bingjur í Hoyvík

Næsta summar flytur løgreglan í Havn úr bygninginum Yviri við Strond og inn í fyribils bygningar, sum verða settir upp við Karlamagnusarbreyt í Hoyvík. Politistøðin verður í trimum hæddum, og verður sett saman av bingjum á einum øki, sum løgreglan ætlandi skal leiga frá Tórshavnar kommunu. Tað upplýsti Dagur & Vika í gjár.

Løgreglan í Havn hevur í tveimum førum verið rakt av blámusoppi. Fyrst í gomlu bygningunum í Jónas Broncksgøtu og síðan Yviri við Strond. Løgreglan hevur seinastu tíðina roynt at finna høli í Havn til leigu, men tað eydnaðist ikki, so nú verður arbeitt við at seta upp fyribils løgreglustøð í Hoyvík.