Lærarar taka støðu til sáttmála

Klokkan tíggju fór nevndin í Lærarafelagnum á fund, millum annað fyri at taka støðu til uppskotið um nýggjan sáttmála við Fíggjarmálaráðið.

Samráðingarnar millum Lærarafelagið og Fíggjarmálaráðið um ein tvey ára sáttmála eru komnar undir land.

Tekur nevndin í Lærarafelagnum undir við uppskotinum um sáttmála, verður sáttmálin undirskrivaður í næstu viku, sigur formaður felagsins.

Lærarafelagið fær somu lønarhækking sum hini fakfeløgini, sum longu hava gjørt sáttmála til 1.oktober 2015.

Nýggi sáttmálin millum Lærarafelagið og Fíggjarmálaráðið verður galdandi frá 1.oktober í ár til 1.oktober 2015.

Formaðurin í Lærarafelagnum, Herálvur Jacobsen, saknar ein virknari lut hjá Mentamálaráðið í samráðingunum, so til ber at gera dagføringar og ábøtur í fólkaskúlanum, uttan at tað skal takast av lønarkarminum hjá lærarunum.

Tað hevur ikki borið til higartil, sigur hann.